रोल्पा जिल्लाको सुनिलस्मृति गाउंपालिकाको कृषि शाखाको संयोजनमा मिति २०७७/१२/०७ का दिन सो गाउंपालिकाका अध्यक्ष गुणेन्द्र घर्ति मगर लगायतका पदाधिकारी तथा अगुवा कृषकहरु सम्मिलित ३३ जनाको टोलीले म्याग्दी जिल्लाको बेनी नगरपालिका वडा नं. ४ मा हरियाली ग्रुपले संचालन गरिरहेको एकिकृत कृषि फार्मको अवलोकन भ्रमण गर्यो । फार्मको भ्रमण पश्चात सुनिलस्मृति गाउंपालिकामा समेत हरियाली मोडेलमा व्यावशायिक कृषि परियोजना संचालन गर्न एक-आपसमा सहकार्य गर्ने समझदारी-पत्रमा हस्ताक्षर गरियो । सुनिलस्मृति गाउंपालिकाको तर्फबाट गाउंपालिका अध्यक्ष गुणेन्द्र घर्तिमगर तथा हरियाली ग्रुपको तर्फबाट संचालक धनलाल जैशीले हस्ताक्षर गरेको उक्त समझदारी पत्र अनुसार सुनिलस्मृति गाउंपालिकामा जग्गाधनी कृषक लगायतका सरोकारवालाहरुको अन्तरकृया आयोजना गर्ने, हरियाली मोडेलमा कृषि परियोजना संचालन गर्नको लागि गाउंपालिकाभित्र १०० रोपनीभन्दा बढी जमिन एकिकरण गर्न सकिने स्थानको पहिचान गर्ने, गाउंपालिकाले परियोजना लागु हुने जमिनको केही वर्षको लिज भाडा तिरिदिने साथै ब्याज अनुदानको व्यवस्था गरिदिने र हरियाली ग्रुपको प्राविधिक सहयोगमा परियोजना अघि बढाउने कार्य-योजना तय गरिएको छ ।
